31/10/2023.- El circuitu de lliteratura d’Asturies, Cultura en Rede intensifica en payares la so programación con talleres creativos, lliterarios y d’animación a la llectura y charles y recitales poéticos per tola rexón. Los circuitos d’Asturies, Cultura en Rede son un proyectu de la Viceconseyería de Cultura, Política Llingüística y Deporte, fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.

Esta selmana Susana Sela va impartir en Villaviciosa’l día 2 de payares el taller Una invasión escentellada, Pintar-Pintar va facer el taller Una bolsa para mis libros el día 3 en Cabranes y Vialibri va esplicar técniques básiques pa ellaborar animaciones en Stop Motion Potion el día 4 en Colunga, una actividá que tamién va celebrase’l día 9 en Llanera.

El 8 de payares va facese’l taller Paleta de colores del Grupo de Teatro Los Pintores en Carreño y Esas pequeñas cosas de Musa Cafeína en Navia y el día 9, ¡Cambiando el cuento! en Tinéu, un taller lliterariu sobre estereotipos de xéneru col qu’Elisabeth Martín va tar el día 17 en Sobrescobiu y el 20 en Noreña.

La biblioteca de Eme de Mar Rojo Teatro va llegar el 10 de payares a A Veiga, La voz de les muyeres na poesía asturiana d’Ediciones Trabe va sentise’l 16 en Llangréu, La tortuga Todovabién y otras historias de autor de David Acera va tar el día 17 en Cangues d’Onís, el mesmu día en que se va facer el taller d’ilustración Etenko y los patines maravillosos con Pintar-Pintar en Ribeseya.

La magia de los libros va tar presente con Movusic el 20 de payares en Muros; en Tapecíes va repasase’l papel de les muyeres escritores na lliteratura asturiana. L’asturianu tien nome de muyer el 23 en Corvera y con Gema Bravo y Jorge Colsa va podese Desandar en igualdad el día 24 en Gozón. Ediciones Radagast va ayudar a Convertir una historia nun videoxuegu’l 28 de payares en Mieres.

Pueden consultase los detalles de les actividaes n’asturiesculturaenrede.es.